Sjálfstæður leikur

Sjálfstæður leikur: góð skemmtun fyrir barnið – og andrými fyrir þig

Það er fátt dýrmætara en þegar barn gleymir sér í leik og þú færð að drekka kaffibollann í friði, elda án þess að halda á barni eða bara anda. Sjálfstæður leikur er ekki bara gulls ígildi fyrir foreldra, heldur lykilatriði í þroska barnsins.

Við þurfum öll stundir þar sem við megum bara vera. Stundir án þess að þurfa að skemmta, hugga, stýra eða undirbúa næsta leik. Sjálfstæður leikur er ekki leið til að losna frá barninu heldur er hann leið til að gefa því rými til að vaxa, þroskast og finna eigin kraft.

Hvað lærir barnið í sjálfstæðum leik?

Sjálfstæður leikur snýst ekki bara um að gefa foreldrum frið. Sjálfstæður leikur er líka afar mikilvægur fyrir þroska barna. Í leiknum fær barnið tækifæri til að:

• æfa ákvarðanatöku
• prófa nýjar hugmyndir
• mæta mótstöðu
• og þróa með sér sjálfstæði, útsjónarsemi og þrautseigju.

Í gegnum sjálfstæðan leik eflist sjálfstraust, þrautseigja og sjálfsþekking – færni sem nýtist út lífið. Barnið lærir að það getur sjálft valið hvað það gerir, hvernig það leikur og hvernig það bregst við þegar eitthvað gengur ekki upp. Með tímanum þróar barnið með sér sterka innri rödd sem segir: „Ég get þetta.“

En hvernig stuðlum við að sjálfstæðum leik?

Sjálfstæður leikur gerist ekki alltaf af sjálfu sér heldur er það hlutverk foreldra að styðja við og efla getu barna til að leika sér sjálfstætt. Börn eiga mis auðvelt með að leika sér lengi sjálfstætt en öll getum við skapað skilyrði sem hjálpa leiknum að blómstra þannig stuðlað að lengri og sjálfstæðari leikstundum:

👉 Hér eru nokkrir lykilþættir:

• Góð rútína og fyrirsjáanleiki hjálpa barni að slaka á og einbeita sér. Börn vilja vita hvað er fram undan.
• Gæðatími og tenging áður en barnið fer í leik eykur líkur á sjálfstæðum leik. Þegar tengslatankurinn er fullur eiga börn auðveldara með að leika sér sjálf.
• Skipulagt og aðgengilegt leiksvæði með einföldum leikföngum og opnum efnivið í opnum hirslum. Of mikið dót getur truflað leikinn og lokaðar hirslur hindra leikflæði.
• Mörk með hlýju: Það er í lagi að segja „ég ætla ekki að leika núna“. Börn læra af því að við höfum okkar þarfir líka.
• Leikboð: Það getur virkað vel fyrir mörg börn að setja fram einfalt leikboð. Þannig hjálpum við leiknum af stað en svo fær barnið að taka við stjórninni.
• Börnum má leiðast: Að börnum leiðist er oft forsenda skapandi leiks. Ekki stressa þig þó barninu þínu leiðist og kvarti undan því.

Sjálfstæður leikur er færni og rétt eins og að ganga, tala eða borða með skeið, þá þróast sú færni með stuðningi og æfingu.

Viltu nánari leiðsögn?

Í netnámskeiðinu Lykillinn að sjálfstæðum leik barna færðu hagnýta leiðsögn til að efla sjálfstæðan leik – skref fyrir skref.

Námskeiðið hefur hjálpað fjölda foreldra að minnka álagið og styrkja leikgleði barnanna sinna – og það getur hjálpað þér líka.

🎓 Smelltu hér til að skoða námskeiðið: Lykillinn að sjálfstæðum leik barna